வசை இல் புகழ் வயங்கு வெண் மீன்		
	திசை திரிந்து தெற்கு ஏகினும்			மது 108	
	தன் பாடிய தளி உணவின்	
	புள் தேம்ப புயல் மாறி	
5 	வான் பொய்ப்பினும் தான் பொய்யா	
	மலை தலைய கடல் காவிரி	
	புனல் பரந்து பொன் கொழிக்கும்
	விளைவு அறா வியன் கழனி
	கார் கரும்பின் கமழ் ஆலை 
10	தீ தெறுவின் கவின் வாடி
	நீர் செறுவின் நீள் நெய்தல்
	பூ சாம்பும் புலத்து ஆங்கண்
	காய் செந்நெல் கதிர் அருந்து
	மோட்டு எருமை முழு குழவி
15	கூட்டு நிழல் துயில் வதியும்
	கோள் தெங்கின் குலை வாழை
	காய் கமுகின் கமழ் மஞ்சள்
	இன மாவின் இணர் பெண்ணை
	முதல் சேம்பின் முளை இஞ்சி
20	அகல் நகர் வியல் முற்றத்து
	சுடர் நுதல் மட நோக்கின்
	நேர் இழை மகளிர் உணங்கு உணா கவரும்
	கோழி எறிந்த கொடும் கால் கனம் குழை
	பொன் கால் புதல்வர் புரவி இன்று உருட்டும்		பட் 295
25	மு கால் சிறு தேர் முன் வழி விலக்கும்		பெரும் 249
	விலங்கு பகை அல்லது கலங்கு பகை அறியா
	கொழும் பல் குடி செழும் பாக்கத்து
	குறும் பல் ஊர் நெடும் சோணாட்டு
	வெள்ளை உப்பின் கொள்ளை சாற்றி
30	நெல்லொடு வந்த வல் வாய் பஃறி
	பணை நிலை புரவியின் அணை முதல் பிணிக்கும்
	கழி சூழ் படப்பை கலி யாணர்
	பொழில் புறவின் பூ தண்டலை
	மழை நீங்கிய மா விசும்பின்
35	மதி சேர்ந்த மக வெள் மீன்
	உரு கெழு திறல் உயர் கோட்டத்து
	முருகு அமர் பூ முரண் கிடக்கை
	வரி அணி சுடர் வான் பொய்கை
	இரு காமத்து இணை ஏரி
40	புலி பொறி போர் கதவின்			மது 354
	திரு துஞ்சும் திண் காப்பின்			பட் 291
	புகழ் நிலைஇய மொழி வளர
	அறம் நிலைஇய அகன் அட்டில்
	சோறு வாக்கிய கொழும் கஞ்சி
45	யாறு போல பரந்து ஒழுகி
	ஏறு பொர சேறாகி
	தேர் ஓட துகள் கெழுமி
	நீறு ஆடிய களிறு போல
	வேறுபட்ட வினை ஓவத்து
50	வெண் கோயில் மாசு ஊட்டும்
	தண் கேணி தகை முற்றத்து
	பகட்டு எருத்தின் பல சாலை
	தவ பள்ளி தாழ் காவின்
	அவிர் சடை முனிவர் அங்கி வேட்கும்
55	ஆவுதி நறும் புகை முனைஇ குயில் தம்
	மா இரும் பெடையோடு இரியல் போகி
	பூதம் காக்கும் புகல் அரும் கடி நகர்
	தூதுணம்புறவொடு துச்சில் சேக்கும்
	முது மரத்த முரண் களரி
60	வரி மணல் அகன் திட்டை
	இரும் கிளை இனன் ஒக்கல்
	கரும் தொழில் கலி மாக்கள்
	கடல் இறவின் சூடு தின்றும்
	வயல் ஆமை புழுக்கு உண்டும்
65	வறள் அடும்பின் மலர் மலைந்தும்
	புனல் ஆம்பல் பூ சூடியும்
	நீல் நிற விசும்பின் வலன் ஏர்பு திரிதரும்		திரு 1,116
	நாள்மீன் விராய கோள்மீன் போல
	மலர் தலை மன்றத்து பலர் உடன் குழீஇ
70	கையினும் கலத்தினும் மெய் உற தீண்டி
	பெரும் சினத்தால் புறக்கொடாஅது
	இரும் செருவின் இகல் மொய்ம்பினோர்
	கல் எறியும் கவண் வெரீஇ
	புள் இரியும் புகர் போந்தை
75	பறழ் பன்றி பல் கோழி
	உறை கிணற்று புற சேரி
	மேழக தகரொடு சிவல் விளையாட
	கிடுகு நிரைத்து எஃகு ஊன்றி			முல் 41,பெரும்119
	நடுகல்லின் அரண் போல
80	நெடும் தூண்டிலில் காழ் சேர்த்திய	
	குறும் கூரை குடி நாப்பண்
	நிலவு அடைந்த இருள் போல
	வலை உணங்கும் மணல் முன்றில்
	வீழ் தாழை தாள் தாழ்ந்த
85	வெண்கூதாளத்து தண் பூ கோதையர்		திரு 192
	சினை சுறவின் கோடு நட்டு
	மனை சேர்த்திய வல் அணங்கினான்
	மடல் தாழை மலர் மலைந்தும்
	பிணர் பெண்ணை பிழி மாந்தியும்
90	புன் தலை இரும் பரதவர்
	பைம் தழை மா மகளிரொடு
	பாய் இரும் பனி கடல் வேட்டம் செல்லாது
	உவவு மடிந்து உண்டு ஆடியும்
	புலவு மணல் பூ கானல்
95	மா மலை அணைந்த கொண்மூ போலவும்
	தாய் முலை தழுவிய குழவி போலவும்
	தேறு நீர் புணரியோடு யாறு தலைமணக்கும்
	மலி ஓதத்து ஒலி கூடல்
	தீது நீங்க கடல் ஆடியும்
100	மாசு போக புனல் படிந்தும்
	அலவன் ஆட்டியும் உரவு திரை உழக்கியும்
	பாவை சூழ்ந்தும் பல் பொறி மருண்டும்
	அகலா காதலொடு பகல் விளையாடி		பெரும் 387
	பெறற்கு அரும் தொல் சீர் துறக்கம் ஏய்க்கும்		பெரும் 388
105	பொய்யா மரபின் பூ மலி பெரும் துறை		பெரும் 389
	துணை புணர்ந்த மட மங்கையர்
	பட்டு நீக்கி துகில் உடுத்தும்
	மட்டு நீக்கி மது மகிழ்ந்தும்
	மைந்தர் கண்ணி மகளிர் சூடவும்
110	மகளிர் கோதை மைந்தர் மலையவும்
	நெடும் கால் மாடத்து ஒள் எரி நோக்கி
	கொடும் திமில் பரதவர் குரூஉ சுடர் எண்ணவும்
	பாடல் ஓர்த்தும் நாடகம் நயந்தும்
	வெண் நிலவின் பயன் துய்த்தும்			நெடு 95
115	கண் அடைஇய கடை கங்குலான்
	மாஅ காவிரி மணம் கூட்டும்
	தூஉ எக்கர் துயில் மடிந்து
	வால் இணர் மடல் தாழை
	வேலாழி வியன் தெருவில்
120	நல் இறைவன் பொருள் காக்கும்
	தொல் இசை தொழில் மாக்கள்
	காய் சினத்த கதிர் செல்வன்
	தேர் பூண்ட மாஅ போல
	வைகல்தொறும் அசைவு இன்றி
125	உல்கு செய குறைபடாது
	வான் முகந்த நீர் மலை பொழியவும்
	மலை பொழிந்த நீர் கடல் பரப்பவும்
	மாரி பெய்யும் பருவம் போல
	நீரினின்றும் நிலத்து ஏற்றவும்
130	நிலத்தினின்று நீர் பரப்பவும்
	அளந்து அறியா பல பண்டம்
	வரம்பு அறியாமை வந்து ஈண்டி
	அரும் கடி பெரும் காப்பின்
	வலி உடை வல் அணங்கின் நோன்
135	புலி பொறித்து புறம் போக்கி
	மதி நிறைந்த மலி பண்டம்
	பொதி மூடை போர் ஏறி
	மழை ஆடு சிமைய மால் வரை கவாஅன்
	வரை ஆடு வருடை தோற்றம் போல
140	கூர் உகிர் ஞமலி கொடும் தாள் ஏற்றை
	ஏழக தகரோடு உகளும் முன்றில்
	குறும் தொடை நெடும் படிக்கால்
	கொடும் திண்ணை பல் தகைப்பின்
	புழை வாயில் போகு இடைகழி
145	மழை தோயும் உயர் மாடத்து
	சே அடி செறி குறங்கின்
	பாசிழை பகட்டு அல்குல்
	தூசு உடை துகிர் மேனி
	மயில் இயல் மான் நோக்கின்
150	கிளி மழலை மென் சாயலோர்
	வளி நுழையும் வாய் பொருந்தி
	ஓங்கு வரை மருங்கின் நுண் தாது உறைக்கும்
	காந்தள் அம் துடுப்பின் கவி குலை அன்ன
	செறி தொடி முன்கை கூப்பி செவ்வேள்
155	வெறி ஆடு மகளிரொடு செறிய தாஅய்
	குழல் அகவ யாழ் முரல
	முழவு அதிர முரசு இயம்ப
	விழவு அறா வியல் ஆவணத்து			மது 328,366
	மை அறு சிறப்பின் தெய்வம் சேர்த்திய
160	மலர் அணி வாயில் பலர் தொழு கொடியும்
	வரு புனல் தந்த வெள் மணல் கான்யாற்று
	உரு கெழு கரும்பின் ஒண் பூ போல
	கூழ் உடை கொழு மஞ்சிகை
	தாழ் உடை தண் பணியத்து
165	வால் அரிசி பலி சிதறி
	பாகு உகுத்த பசு மெழுக்கின்
	காழ் ஊன்றிய கவி கிடுகின்
	மேல் ஊன்றிய துகில் கொடியும்
	பல் கேள்வி துறைபோகிய			மது 760
170	தொல் ஆணை நல் ஆசிரியர்			மது 761
	உறழ் குறித்து எடுத்த உரு கெழு கொடியும்
	வெளில் இளக்கும் களிறு போல
	தீம் புகார் திரை முன்துறை
	தூங்கு நாவாய் துவன்று இருக்கை			பட் 212
175	மிசை கூம்பின் நசை கொடியும்
	மீன் தடிந்து விடக்கு அறுத்து
	ஊன் பொரிக்கும் ஒலி முன்றில்
	மணல் குவைஇ மலர் சிதறி
	பலர் புகு மனை பலி புதவின்
180	நறவு நொடை கொடியொடு			பெரும் 337
	பிறபிறவும் நனி விரைஇ
	பல் வேறு உருவின் பதாகை நீழல்
	செல் கதிர் நுழையா செழு நகர் வரைப்பின்
	செல்லா நல் இசை அமரர் காப்பின்
185	நீரின் வந்த நிமிர் பரி புரவியும்
	காலின் வந்த கரும் கறி மூடையும்
	வடமலை பிறந்த மணியும் பொன்னும்
	குடமலை பிறந்த ஆரமும் அகிலும்
	தென் கடல் முத்தும் குண கடல் துகிரும்
190	கங்கை வாரியும் காவிரி பயனும்
	ஈழத்து உணவும் காழகத்து ஆக்கமும்
	அரியவும் பெரியவும் நெரிய ஈண்டி
	வளம் தலைமயங்கிய நனம் தலை மறுகின்
	நீர் நாப்பண்ணும் நிலத்தின் மேலும்
195	ஏமாப்ப இனிது துஞ்சி
	கிளை கலித்து பகை பேணாது
	வலைஞர் முன்றில் மீன் பிறழவும்
	விலைஞர் குரம்பை மா ஈண்டவும்
	கொலை கடிந்தும் களவு நீக்கியும்
200	அமரர் பேணியும் ஆவுதி அருத்தியும்
	நல் ஆனொடு பகடு ஓம்பியும்
	நான்மறையோர் புகழ் பரப்பியும்
	பண்ணியம் அட்டியும் பசும் பதம் கொடுத்தும்
	புண்ணியம் முட்டா தண் நிழல் வாழ்க்கை
205	கொடு மேழி நசை உழவர்
	நெடு நுகத்து பகல் போல
	நடுவு நின்ற நல் நெஞ்சினோர்
	வடு அஞ்சி வாய் மொழிந்து
	தமவும் பிறவும் ஒப்ப நாடி
210	கொள்வதூஉம் மிகை கொளாது கொடுப்பதூஉம் குறை கொடாது
	பல் பண்டம் பகர்ந்து வீசும்
	தொல் கொண்டி துவன்று இருக்கை		பட் 174
	பல் ஆயமொடு பதி பழகி
	வேறுவேறு உயர்ந்த முது வாய் ஒக்கல்		பட் 253,திரு 284,சிறு 40
215	சாறு அயர் மூதூர் சென்று தொக்கு ஆங்கு
	மொழி பல பெருகிய பழி தீர் தேஎத்து
	புலம் பெயர் மாக்கள் கலந்து இனிது உறையும்
	முட்டா சிறப்பின் பட்டினம் பெறினும்
	வார் இரும் கூந்தல் வயங்கிழை ஒழிய
220	வாரேன் வாழிய நெஞ்சே கூர் உகிர்
	கொடுவரி குருளை கூட்டுள் வளர்ந்து ஆங்கு
	பிறர் பிணியகத்து இருந்து பீடு காழ் முற்றி
	அரும் கரை கவிய குத்தி குழி கொன்று
	பெரும் கை யானை பிடி புக்கு ஆங்கு
225	நுண்ணிதின் உணர நாடி நண்ணார்
	செறிவு உடை திண் காப்பு ஏறி வாள் கழித்து
	உரு கெழு தாயம் ஊழின் எய்தி
	பெற்றவை மகிழ்தல் செய்யான் செற்றோர்
	கடி அரண் தொலைத்த கதவு கொல் மருப்பின்
230	முடி உடை கரும் தலை புரட்டும் முன் தாள்		சிறு 199
	உகிர் உடை அடிய ஓங்கு எழில் யானை
	வடி மணி புரவியொடு வயவர் வீழ
	பெரு நல் வானத்து பருந்து உலாய் நடப்ப
	தூறு இவர் துறுகல் போல போர் வேட்டு
235	வேறு பல் பூளையொடு உழிஞை சூடி
	பேய் கண் அன்ன பிளிறு கடி முரசம்
	மா கண் அகல் அறை அதிர்வன முழங்க
	முனை கெட சென்று முன் சமம் முருக்கி
	தலை தவ சென்று தண் பணை எடுப்பி
240	வெண் பூ கரும்பொடு செந்நெல் நீடி
	மா இதழ் குவளையொடு நெய்தலும் மயங்கி
	கராஅம் கலித்த கண் அகன் பொய்கை
	கொழும் கால் புதவமொடு செருந்தி நீடி
	செறுவும் வாவியும் மயங்கி நீர் அற்று
245	அறு கோட்டு இரலையொடு மான் பிணை உகளவும்	முல் 99
	கொண்டி மகளிர் உண்துறை மூழ்கி
	அந்தி மாட்டிய நந்தா விளக்கின்
	மலர் அணி மெழுக்கம் ஏறி பலர் தொழ
	வம்பலர் சேக்கும் கந்து உடை பொதியில்
250	பரு நிலை நெடும் தூண் ஒல்க தீண்டி
	பெரு நல் யானையொடு பிடி புணர்ந்து உறையவும்
	அரு விலை நறும் பூ தூஉய் தெருவில்		முல் 9-10
	முது வாய் கோடியர் முழவொடு புணர்ந்த		பட் 214,திரு 284,சிறு 40
	திரி புரி நரம்பின் தீம் தொடை ஓர்க்கும்
255	பெரு விழா கழிந்த பேஎம் முதிர் மன்றத்து
	சிறு பூ நெருஞ்சியோடு அறுகை பம்பி
	அழல் வாய் ஓரி அஞ்சுவர கதிர்ப்பவும்
	அழு குரல் கூகையோடு ஆண்டலை விளிப்பவும்
	கணம் கொள் கூளியொடு கதுப்பு இகுத்து அசைஇ	மலை 44
260	பிணம் தின் யாக்கை பேய்மகள் துவன்றவும்		சிறு 197-198
	கொடும் கால் மாடத்து நெடும் கடை துவன்றி
	விருந்து உண்டு ஆனா பெரும் சோற்று அட்டில்
	ஒண் சுவர் நல் இல் உயர் திணை இருந்து
	பைம் கிளி மிழற்றும் பால் ஆர் செழு நகர்
265	தொடுதோல் அடியர் துடி பட குழீஇ		பெரும் 169,மது 636
	கொடு வில் எயினர் கொள்ளை உண்ட
	உணவு இல் வறும் கூட்டு உள்ளகத்து இருந்து
	வளை வாய் கூகை நன் பகல் குழறவும்
	அரும் கடி வரைப்பின் ஊர் கவின் அழிய
270	பெரும் பாழ் செய்தும் அமையான் மருங்கு அற
	மலை அகழ்க்குவனே கடல் தூர்க்குவனே
	வான் வீழ்க்குவனே வளி மாற்றுவன் என
	தான் முன்னிய துறைபோகலின்
	பல் ஒளியர் பணிபு ஒடுங்க
275	தொல் அருவாளர் தொழில் கேட்ப		மது 72,124
	வடவர் வாட குடவர் கூம்ப
	தென்னவன் திறல் கெட சீறி மன்னர்
	மன் எயில் கதுவும் மதன் உடை நோன் தாள்		திரு 4
	மா தானை மற மொய்ம்பின்
280	செம் கண்ணால் செயிர்த்து நோக்கி
	புன் பொதுவர் வழி பொன்ற
	இருங்கோவேள் மருங்கு சாய
	காடு கொன்று நாடு ஆக்கி
	குளம் தொட்டு வளம் பெருக்கி
285	பிறங்கு நிலை மாடத்து உறந்தை போக்கி
	கோயிலொடு குடி நிறீஇ
	வாயிலொடு புழை அமைத்து			பட் 144
	ஞாயில்தொறும் புதை நிறீஇ
	பொருவேம் என பெயர் கொடுத்து
290	ஒருவேம் என புறக்கொடாது
	திரு நிலைஇய பெரு மன் எயில்			பட் 41
	மின் ஒளி எறிப்ப தம் ஒளி மழுங்கி
	விசி பிணி முழவின் வேந்தர் சூடிய
	பசு மணி பொருத பரேர் எறுழ் கழல் கால்		பெரும் 60,நெடு 31
295	பொன் தொடி புதல்வர் ஓடி ஆடவும்		பட் 24
	முற்று இழை மகளிர் முகிழ் முலை திளைப்பவும்
	செம் சாந்து சிதைந்த மார்பின் ஒண் பூண்
	அரிமா அன்ன அணங்கு உடை துப்பின்
	திருமாவளவன் தெவ்வர்க்கு ஓக்கிய
300	வேலினும் வெய்ய கானம் அவன்
	கோலினும் தண்ணிய தட மென் தோளே